«E gueti Sach – Es Ischbahndach» Mit däm Slogan het ds Umfäud vo üsem SC Langnou vor chli meh aus 50 Jahr fürnes Dach ufdr Ilfis gworbe. Was hüt mit Crowdfunding zur Mode isch worde, heimer z Langnou scho denn praktiziert: Aui Fans, Symapthisante, Langnouerinne, Ämmitaler und natürlech o Lüt drüber use heisech mit au ihrne Müglechkeite drfür ihgsetzt, dassmer sinerzyt mitem Dach dr Grundstei für die hütigi Ilfishalle het chönne erboue. Ermüglecht hei das aui Lüt, wo gägene Spänd Chläbere mit däm legendäre Spruch hei kouft. Waldbsitzer, Bure u Arbeiter wo Naturalspände wie Houz hei erbracht und natürlech ds damalige Vereinsumfäud wo dä Chraftakt usdr ganze Bevöukerig koordiniert u schlussändlech o bewärkstelliget het. Mitere verglichswiis chliine Geste – mitere Choreo im hütige Heimspiu – tüemer dene Lüt danke, wosech mit au ihrne Mittu und Müglechkeite füre Bou vom Ischbahndach vor öppe 50 Jahr ihgsetzt hei. Mit däm Ahdänke weimer d Erinnerige für aui die lah ufläbe, wo scho denn si e Teil gsi vom SCL. Für aui angere weimer üsi Gschicht no einisch lah ufläbe dass nie i Vergässeheit gratet, wie einzigartig üse Verein isch.
E gueti Sach – Es Ischbahndach. Für immer SC Langnou.
SEKTOR 46 LANGNAU
