Vor fasch 80 Jahr isch üse Schlittschuh-Club Langnau gründet worde. Sit denn verbindet dr SCL Lüt us aune Schichte u Generatione. Ob ds Buuremeitschi vom Schangnou, dr Zimmermaa us dr Gohl, d Malerin vom Bärou, Lüüt vo Burgdorf, Chonu oder vom Äntlibuech oder dr Wirt vom Dorf: Aui hei zum SCL ä Verbindig. Sigs dürs Hockeyle bim SCL säuber, aus Zueschouer i dr Ilfis oder eifach nume aus gspannte Verfouger vode Hockeyresultat ir Zytig und im Radio.
I üsere Gschicht heimer banget, glitte u gfiiret. Ds Wächsuspiel zwüsche Truur und Euphorie hetsech über aui Generatione dürezoge. Düre Meistertitu 1976, Ab- und Ufstieg u Playoff-Teilnahme. Mir heis immer verstange, Erfouge z fiire. Mängisch villech e chli z fest. Vorauem aber heimer nach Rückschläg nie ufgäh. Si ufgstange. Hei kämpft. Gring abe u hüü! Wiesechs äbe fürne ämmitaler Traditionsclub so ghört.
Gly wird dr SCL 80 jährig. Drum weimer zrüggluege uf 80 Jahr Liideschaft, Emotione, Kampf, Kult, Truur und Erfouge. Gmeinsam löhmer z Erläbte mit däm einzigartige Club us Langnou lah ufecho. U gmeinsam nähmer d Zuekunft vo üsem Club i Ahgriff. Um wiiteri unvergässlechi Erfouge mitem SCL chönne z fiire.
Am Samsti, bim Heimspiu gäge Ambri wird’s e grossi Choreo gäh. Mir bitte öich, denn scho ab 19.30 uf öine Plätz z’ si und de Ahwiesige vom Choreoteam z’fouge.
D Realisierig vo setigne Choreos nimmt viu Zyt u Gäud i Aspruch. Für d Choreo nächst Samsti si rund 443,5 Arbeitsstunde, 150 Liter Farb u 570 Quadratmeter Stoff investiert worde.
Füre Materiaubedarf o i Zuekunft chönne z decke wirds nachem Spiu am Samsti e Choreosammlig gäh. Ungerstützet die aktivi Fanszene finanziell, dassmer o i Zuekunft Choreos idr Ilfis chöi präsentiere.
Merci für öii Ungerstützig. Mir gseh üs am Samsti!
